رسمته من الفرحه سحايب تهل امطار

ونسيت الشعوف اللي لا هبت تسريها

غشيمٍ وانا شاطر ولي حسبة الشطار

وانا عارف وداري ولا اجهل معانيها

علئ الغصن كم طيرٍ يوقع وياكم طار

وكم قانصٍ هدف عليها ويخطيها

وكم حاليٍ زادت حلاته وعود قار

وكم مالحٍ ملحه هو اللي محليها

وكم عارفٍ حارت عليه وماهو يحتار

وكم جاهلٍ عارف وهو دوم يعميها

سواد الليالي دايمٍ يدفن الاسرار

ونور الفجر يظهر ويفضح خوافيها

انا الغايب اللي صار ماهو من اهل الدار

وانا الدار لكن وين منهم اهاليها

غريبٍ وانا راعي محلٍ ولي مقدار

تغربت في داري وانا كنت حاميها

ومشيت الدروب وكني ادور في دوار

وكن الدروب اللي بدت تنتهي فيها

وكنت اليمين وكان غيري علئ ليسار

وصارت يسار الناس تشبه يمانيها

ومريتهم زاير وقدني من الزوار

وشفت الاماكن والحزن صار كاسيها

ومريت بيتٍ خابرٍ داخله تذكار

وشفت الذواري فوقه يهب ذاريها

وقابلتها صدفه وشوقي لهيب ونار

وصديت كني ماعرفها وناسيها

وجتني تعانقني وتشكي من اللي صار

وشفت العيون وصادق الدمع كاويها

وقالت طلبة الله تردك علي الاقدار

ونسلم من دموع المفارق وطاريها

وانا داريه باني جرحتك بدون اعذار

وعطني جروحك والله اني بداويها

وقلت اعذري من كان واحد من الخطار

وداره جفتْه وعاف داره وراعيها

وقفيت وعيوني عليها تهل عبار

حزينٍ عليها لكن اليوم مابغيها