عليك بالعليا وكسب الجميله

العمر مره لاتحسبنه امرار

رجل تهون بعينه المستحيله

ورجل على ادنات السواليف يحتار

رجلٍ يجمل في كلامه قبيله

ورجلٍ يجي ويروح مايشعم النار

لولا الزمن مافيه عدله وميله

ماكان ميزنا عن صغار وكبار

ماتقطع الفرجه بليا دليله

وماتصهل المهره مع غير مغوار

وكلن على ماقيل يلقى حصيله

قصر الشبر والا على طول الاشبار

انا رقيت من الرجوم الطويله

وانا كسبت من الرجاجيل الاخيار

والا الخذيله مالنا فالخذيله

الله خلقنا للوفا سر وجهار