ابو الأيتام صالح سعدهم مادام يرجونه

اخو ذو الاحتياجات يتفقدهم ولد خالي

خلقه الله عون لمن يسبب عوقه غبونه

وذراع للضعيف اللي يمد ايده ولا طالي

يجود بكل ما يملك لمنهم يستحقونه

وابر من الولد للشايب اللي ماله عوالي

وكم مديون لو عجز الوليد يسدد ديونه

يسدد دينه وهو يشرب له من البن فنجالي

عطاه الله وصوف المؤمنين اللي يطيعونه

اللي الدنيا ما تسوى عندهم لو ربع مثقالي

وعطاه الله من قلب الشجاع العشق وجنونه

ورحمة من يرى انه للبشر بعد الله الوالي

وعلى ما جاه من جور الدهر والحزن وشجونه

هذا هو واقف مثل الشجر لغصونه ظلالي

حاولت اطيح مثله واقف وآطيح من دونه

اصيل شامخ مهما يميل الوقت ما مالي

يذكرني بضلع طويق ماش حرك اركونه

ومهما أقول ولا آعيد تقصر دونه أقوالي

هذا اللي واجب إن كل القبيله تنثني دونه

ولا تجحد ولا تهمل مواقف طيب الفالي

هذا بس اللي فزعاته لناس ما يعرفونه

هذا اللي لا عطت يمناه ماكن عنده شمالي

ما يدري من عزم ضيف ماهو بلخاطر عيونه

إذا اللقمه بمينه في شماله شرط جوالي

وهمه قائمة لسما بجواله يشوفونه

ولا همه ما لحق الضيف من تصوير واذلالي

قبل يدرون ضيفانه بقصده كان ياتونه

وبعد ما بانت أهداف المعزّب جاهم اجفالي

عسىالله لا يحن ضيوف هذا لو يحنونه

وعسى لو كثرو بالخير ما يقبلهم الوالي

لحيث إنه مقصر في حقوق اللي يصالونه

وتجهد في قطع وصل الرحم بالحيل والحالي

وعلى ما قال ابن باصم لجمهور يلومونه

بعد ما اقفى وفارقهم لحاله بالخلا الخالي

يوم انه قال أنا اللي لمتكم فاللي تسوونه

وملامي في محله فحسن ابعد منكم لحالي

له البيضا بدال اللوم ممن سبب طعونه

وطراة الذيب يلحس كيته ما دام يحتالي

ولا عاد يتحمل ذَا الزمن من كان يؤوذونه

ويفضل عشرة سباع الخلا من قرب لنذالي

سوى فولاذي الهمه لديه الصعب يا هونه

هواه الصبر ،ماه العزم ،مره بالأمل حالي

ويخلي الريع في العقال جاهلهم يعذلونه

لا يجعل عقله بكفه ويرصغ قيد وعقالي

أنا شاعر علي عهد وعهد الله ما آخونه

ما اقول إلا حقيقة كل شخص مر في بالي

فمن تطحن رحى نقدي حبوبه ما برى كونه

ومن استاهل اعجابي بمدحه وارفع له عقالي

ونصف المجتمع لو ضاق فيعود علي دونه

واتحدا من على راْسه تراب يجلس قبالي

امانه يالحضور العلم للغايب تردونه

عساه يفيد من يبغى يصير اول وهو تالي

وسلامتكم وانا اللي هاضني من وعده يخونه

وشوفي للقرايب لحقهم خذلان من تالي

فقلت اثني على اللي بيننا عاده على كونه

واكثر ما شدني له كيف يرويه أشهب اللالي

يا نفدا اللي على ظني عساني مخلف ظنونه

وعاده تربية خالي يحب المرقب العالي

ونبي الله عسى فيني الشفاعه منه مضمونه

عليه ازكى صلاة الله عدد ما هل همالي