يا الله يا اللي كل ابينا عبيده

يا مالك الاملاك علاّم الاسرار

يا رب جارك م َ الحياة الزهيدة

وجارك من الدنيا وحذفات الاقدار

مرّات بالهيّن ومرّ ٍ شديدة

الموجه الموجه وهبّات الاعصار

دنياك يا رجّال هذي عنيدة

ماكنّها الاّ يا بشر لعب مقطار

وجتنا بتاليها علوم ٍ جديدة

واللي مضى من وقتنا صار تذكار

سطرت لي في المجد صفحة مجيدة

ورسمت منهاجي على درب الاخيار

وفي الاربعين ادركت لحظة فريدة

ونوّخت مركوبي على صرح الافكار

وبنيت بالحكمة قصور ٍ تليدة

وسطّرت من خير الوصايا والاذكار

منظومة ومؤلفاتٍ عديدة

وديوان من زين المثايل والاشعار

والخيل لي فيها علوم ٍ أكيدة

أنا بصولتها على الخيل بيطار

وحقّقت في الدنيا مرامٍ بعيدة

الباع زدته باع والشبر بااشبار

وما اخاوي الاّ ذا الخصال الحميدة

وما اصاحب من الناس يا كود الاخيار

أوصيك يا زيّاد منّي فريدة

خلّك على الدنيا حليم ٍ وصبّار

وترى الحكيم يقيس دنياه بيده

ويدرك عواقبها قبل ماشي ٍ صار

والكذب له لفّات والصدق سيدة

والناس فيهم طيّب وفيهم اشرار

وترى الكرم راعيه يفني رصيده

وترى الشجاعة سيف يابوك بتّار

اخو الرجل يا زياد زنده عضيده

وهو محزمه لما عليه الدهر جار

يماري بفزعاته ويطرب لجيده

وهو عينه اللي دونها مابه ابصار

يمناك ما تقدر تصفّق وحيدة

لابد ما تصفق يمينك على ايسار

والكف ما يلطم بلا مَدّة ايده

والطير لو يفقد جناحيه ما طار

ولا تاخذ الاّ بنت قرم ٍ وليدة

ياتي ولدها بااول الخيل كرّار

ياتيك بالجزلة والاريا السديدة

وان جا نهار الهوش ياتيك مغوار

ولا تخاوي كون وافي وعيده

حذراك من خوّة لئيم ٍ وغدّار

وترى الرجال تقيس ندّ بنديده

والرجل باصحابه بقيسٍ ومقدار

وترى بعض الاشيا تجر النقيدة

وترى بعض الاخصام في خصمته عار

خلك مع الاول بعلمه وفَيْده

وخلك مع ربعك ولو صار ما صار

وابعد عن اللي بيده يشدّ قيده

لي جا بينهض ردّه القيد ما سار

والجأ إلى الله لي وزتك المكيدة

إليه بث أحزانك بسرّ واجهار

فهو الذي قادر على ما يريده

وباامره تجوب الفلك في غب الابحار

وصلاة ربّي عند ختم القصيدة

على النبي الهاشمي سِيد الاطهار