الله من قلب (ن) من الهَمّ قسمين

قسم (ن) غدا في مصر وقسم (ن) بعمّان

فيصل له بعمّان من فوق عامين

وناصر بدار النيل ضجر (ن) ووجعان

لا من ضواني الليل والناس ممسين

عافت عيوني النوم وامسيت سهران

اتْضج ّبي الاحزان من حين لا حين

وامشي على كيف الزمن كيف ماكان

أخوك شوفك لي غدا عميَت العين

وياعزتي للي فقد شوف الاعيان

واخوك سيفك في وجيه المعادين

وان جار حملك يرتكي له بليهان

وابنك سواة القلب بين الشرايين

صرخك الى من ثار عج (ن) ودخّان

لي ثار عج الخيل وسط الميادين

في ساعات الضيقات يرسي كحيلان

وايش انت يارجّال من دون الاثنين

طير نوى المطيار من دون جنحان

من عقبهم ياتون صرخ (ن) قريبين

الاد عمّ (ن) في الملاقاة شجعان

ثم ربعك الادنين والربع الاقصين

الكل منهم وافي (ن) لي بدا الشان

ماينفع الرجّال لي طاح الاسّين

ما يشعبه ياكون ربعه والاخوان

عزّيت يا صبيان من جاه ثنتين

فقير ما له صرخ لي جاه عدوان

انا اشهد انّه واقع (ن) بين نارين

عنده حداها اعسر من الموت عزران

حذْف الزمان ايجيك بيسار ويمين

وبقعا محاذفها على كل إنسان

نصبر ليا جتنا ولا حن بوجلين

ونحمد إله الكون في كل الاحيان

فياالله يا مِنْزل تبارك ويا سين

يا دامح السيّه ويجزا بالاحسان

انت الرجا ياالله في العسر واللّين

اتْبوجها بَوْجتْك للصبح لي بان