الدرب قدّامك ولي فيك هَقْوَه

لانك سميِّ بصيّر طير حوران

وابيك واجدادك من الناس نَقْوَه

متندّر (ن) ما بين عم و خيلان

الهون دربه هون و العز شَقْوَه

والمرجلة تبغى جِمَلْها بليهان

مايزرع المخلوق يلقاه لَقْوَه

لايمكن ان تجني من الشوك رمّان

والحنظلة لو سُقْوَها النيل سَقْوَه

تبقى مرارتها على طول الازمان

واللاش محزم لاش لو شد حَقْوَه

لا تحتزم به ترّكه لي بدا الشان

عليك باللي فيه طيب (ن) وتَقْوَه

وصليب راس وفي الملاقاة شَجْعان

ولي فيك ياناجي مع الوقت هَقْوَه

وعسى الولي ياقاك في كل الاحيان