عسى الله لا يقْطع من الطيّبين وصوف

وعساها لسَمحين القِبَل في الرجا ذِمّة

وعسى الله يجمّل شايب ٍ للعطا مشعوف

ويصخي حلاله في لوازم بني عمّه

فتح مجلسه للربع والاّ لجوه ضيوف

كريم العطا كُثْر المخاسير ما همّه

يشاري لفعل الجُود ويقدّم المعروف

كبير الهقاوي منزله عالي القمة

هذا الشيخ ابن سرّار كفّه تعدْل كفوف

هذا جابر اللي له عزوم ٍ وله همّة

هذا سِعْد ابن عمه ليا جت ليالي الخوف

هذا فرحة الصاحب وذا للعدا غَمّه

يسدّد نقوب الشان لي جرّها الملقوف

ويدرُج لجمع الشّوْر في ساع ويلمّه

يسِد الفجاج اليا عوى ذيبها ويحوف

وحمّاي ساقة تالي الربع ويزِمّه

عسى جعل يفدونه ردي ٍ وطايح شوف

نظيرين جهمة وان تبخّستهم رِمّة

ويفداه خاطي واحد ٍ جودته بشفوف

ولي جا يمدّ الكف بيعايده كُمّه