الليل يحبسني..وانا ودي آطير

حاولت أحبه ..بس ماالله هداني

انا احب الفجر ..مثل العصافير

واحب اشوف الناس قاصي وداني

واحب اشوف اللي معي دايم بخير

واتعب اذا شفت ابن آدم يعاني

لاني من اللي يعبدون المزامير

ولاني من اللي يكرهون الاغاني

اشرب من الجمّه ..ولا أدفن البير

واعطي لمن في حاجتي ..ماعطاني

ولا ادّور للعداوات ..تبرير

هذا دمي ..ان طاعني او عصاني

ولا افسر زلّتك اي ..تفسير

غلطه وعدّت .. وانت اسف عشاني

ولاثنيت عزوم رجلي عن السير

للخطوه اللي ماتنزّل مكاني

عندك ..وعند اللي هواها نواوير

ان جيتها خايف ..عطتني اماني

علمتك .. آنا غير ..وحكايتي غير

ولا تشبّهني.. بأي حَدْ ثاني

وانا هنيّا ..وانت تصبح على خير

ابعد قريب..ومن بغاني ..لقاني