مابه ثقيل الا جميل الرجاجيل

اما ثقيل الوقت باروغ منه

برخيه لما زاد عن طاقة الحيل

وما طاح ولاراح ما ضقت منه

وبيشل همه واحدن يعدل الميل

اللي العطا والجود والخير منه

وكمن حمر عين على الحط والشيل

اللي شموخه نابعٍ من مغنه

هاذاك يظهر فالمواقف كما الفيل

كمن قصير ذراع ماقرب منه

بعض الرجال لها مداها كما الخيل

واذا اقحمت مامسّكتها لعنه

تظهر وجيه القوم مثل القناديل

ولها ضيا ولها صمودن تكنه

ولها على العليا فعول ومداهيل

واهل حميه للرفيق ومحنه

واللي يحسن كل غلطه بتأويل

ولا يزكي النفس بنه وبنه

يعرف وجيه المقفيه والمقابيل

ويحسب حسابه فالخلاء والمجنه

غنت له الدله وبيض الفناجيل

وصافي الجبين اللي على حسب ضنه

وتبنى له البيضاء على كل حلحيل

مامر من عبر السما يرفعنه

ولا نسيت اهل الكفوف المخاطيل

ولا عليها ليّ مخلوق منه

وان وازنت لفكار يرجح بها الكيل

ودايم خطاها واطيه كل عنه

روس ان على كسب المراجل مهابيل

وعلى الوفاء ومزارق الطيب طنه

ابديت ذي واللي وراها دهاليل

ونقّيت قولن يفطن الذهن منه

والله يصاحب كل امر بالتساهيل

ويعينا في كل لابد منه

واقرو معي النشره وعيدو التفاصيل

وكلن يغني حسب ذوقه وفنه

نصايحن وعْبَر لجيلن بعد جيل

ودايم لها في درب لجواد رنه

وانا ونيس سهيل ومخاوي اليل

وقريحتي في خدمتي مستجنه

وقلبي نحاوي كل ليل معه سيل

يصبح ويمسي فيه ماجف منه

ساقه على الجالين غزر المخاييل

وقعن صدوقن صدق ماهو بكنه

يسبح به اللي في حياته غرابيل

وتحت الضلوع ميه وستين ونه

ونات أسف ماهو بدخل ومحاصيل

على زمانن فيه منه وغنه

وْلايبري الونات كون المشا كيل

وعقيدتن تلزم بفرضٍ وسنه