ملحمة نجران
فيني طفِل يعبَث بذكراي |
لاغاب طاريه عن بالي |
أبطى لوَصله يحِنّ أقصاي |
وأبطى لدنياه ترحالي |
له شوق متغلغلٍ باحشاي |
تزهر باحاسيسه آمالي |
يبعد واحِسّ انّه بجوّاي |
وافعاله تخاشِر أفعالي |
فيِ حِزني وفرحتي ومناي |
فيِ سِلمي وثورة قتَالي |
شيّدت به للزمن مبناي |
واستوعَب الجاي والحالي |
ياطِفل يا أجمَل عمر دنياي |
ما في العمر بَعدكم سالي |
من غابت أمّك وشَحّ بكاي |
ماهَلّ دمعه على غالي |
قالوا تجي لين مَلّ سواي |
واستَنكَرَت عيني أحوالي |
وادرَكت فقدي لصوت غناي |
ولحزني أدرَكت مَوّالي |
واحسَست كيف ارتباك اجزاي |
وإني بهَالعَالَم لحالي |
وانّك عمر زَلّ واللي جاي |
عمرٍ تهيّا لغربالي |
أخلاط وإن عزّهم مبداي |
كلٍ يبي راسه العالي |
وأقوام من بَعد تَبع خطاي |
اليوم قِدني بهُم تالي |
واللي تودّد يبى ممشاي |
متربّص الذمّ لخصالي |
لو كان له في العَرَب شرواي |
هَمّّيته إن صَغَّر أفعالي |
غبنه وهو للثنا شَرَّاي |
عَيّا عليه وتهيّا لي |
ياخيبة الطيب في مسعاي |
ماخَالَف أوّلهم التالي |
لا هُم بشوقي وَلا مرماي |
شرّفت واعليت مدهالي |
وإن جيت فيهم فلِي معناي |
والوَسم يحري به اقبالي |
ممشاي للعِزّ قََبل حكاي |
أفعالي أجزَل من اقوالي |
والرّاس خضّعتِِه لمولاي |
والكِبر لا عَزّ له والي |
أحوم والنَصر فال عداي |
حتى جعَلت النَصِر فالي |
وإن ثِرُت ماقِلت ويش الراي |
طِبّ المهبّل من هبالي |