يقول من بين على راسه الشيبب

والوقت مغتصبه ولاعه وغره

باقي صغير وشاف مايشلع الجيب

بالصدر ضيق وداخل القلب حره

خلوه ناسه لشقا والمطاليب

ودولاب فكره للهواجيس كره

لكن على اللي يعلم السر والغيب

اللي مهو يخفاه مثقال ذره

بصبر عسى الله يستر والحال ويثيب

نفسي عن الزلات في كل مره

ومادامني عديت روس المراقيب

وقمت اتنقى الشعر من كل صره

وجريت موالي وجاوبني الذيب

انا اشهد ان الذيب بعواه جره

وانا على صوته تركزت بالطيب

وغزيت دار الشعر جوّه وبره

هاجمته بعين الفكر والأساليب

وخذيت انا وياه كره وفره

وسريتها والدرب مايعرف العيب

بالراس شر وياكفى الراس شره

وسقت القوافي سوق من ساق له جيب

وتله بنمره ثم تله وزره

قضى حياته بين حمله وتهريب

حمله يسريها وحمله تُعره

لعيون من تسوى جميع الرعابيب

اللي غلاها في عيوني مقره

واللي هواها ماعرف شك أو ريب

لعيونها داعبت نجم ومجره

واللي لمن جيته لقيت التراحيب

ويعيش قلبي بين ضحك ومسره

انا اشهد انها تنثني للمواجيب

حره وبنت رجال والفين حره

مكانها خلف الظلوع المحاديب

احسّها في وسط قلبي تُحره

اللي غرامه تلني بالتلابيب

ياطر جيبي من غرامه ياطره

ابو عيون ٍ تسلب القلب وتصيب

ابراج قلب اللي عيونه تغره

اللي حدود خطاه خيمه واطانيب

ماتبتعد عنها تخاف المظره

ماداجت بسوق الفحيحيل والسيب

وملبوسها من زود ستره تجره

بنت البدو تاطى بنات الطحاليب

بنت ارحبو بنت البقى بنت دُره

بنت البدو ومعكفين الأشانيب

اللي تشوش وتعتزي وتشره

من شعب ابو متعب عطيب المضاريب

اطلق شنب ياقف بوجهه يهره

اللي حلاها أدب القلب تأديب

وريموت قلبي كيف تبغى تفره

هي وارثة حبي بكل العذاريب

تارث مادام انها لقلبي تبره

وانا ورثت الشعر والعز والطيب

وصح الله لسااااني ولله دره