الغصه اللي ناشبه داخل الزور

لو عاش راسي للأبد مانثرها

وماحلها ساحر وكاهن ودكتور

ويبطون ماجابوا مصادر خبرها

ياليتها غصة قصايد وحنجور

كان اقلب الساحه على اللي نحرها

واصاقع براسين تركي ومستور

كذا طناخة راس يقدح شررها

وادوس روس العور وادعس على الصور

واحتدها في زاويه واحشرها

واهجي وراعين الشعر دون محظور

والعن ثواها كلها واحتقرها

واطلع وانا خلفي قبايل وجمهور

ماتنحصر لو حاولوا في حصرها

لكنها غصة أحاسيس وشعور

هليتها واللي نشرها نشرها

احس في صدري ثمانين دافور

بانت على وجهي معالم خطرها

فكري مشتت والصدر صاير يفور

والعين تشكي من سبايب سهرها

ومن طب في بحر الهوى عاش معذور

واحلا سنين العمر يقطف زهرها

من وقتها وانا مهوي ومطيور

مقلع سما والكبد بيده مزرها

يامضيعه من سوق توفي وغندور

طلي على نفسِ خذاها فحرها

وروفي بحال اللي من الوقت مدمور

حظه ردي واغلب حظوظه خسرها

في غيبتك ضايق ولاني بمسرور

ونفسي ورب البيت زايد كدرها

من ضيقتي أضرب بخمسي على الزور

واصيح صيحة من يمنه خسرها

والحب عايش طول الايام معمور

ماهزته عوج السنين وقهرها

يقوله اللي بالهوى شيد قصور

لجل اللذي كلتا عيوني سحرها

ماهي بهاموره ولا بنت هامور

بنت الشيوخ اللي تزايد فخرها

واللي أبوها بين ذا الناس مذكور

يوم ان بعض الناس محدٍ ذكرها

حوريةٍ ماهي مثل باقي الحور

قلبي وعمري والقصايد مهرها

مكانها في داخل القلب محفور

عمار يادارٍ وليفي عمرها

ماهو بحب ايام وليال وشهور

يبقى الين الرجل يفنى أثرها

وتبقين فوق الناس يامطلع النور

ياجمل جميلات البنات وثمرها

ويبقى معك قلبي على طول محصور

فديت من تل العروق وحصرها

والكلمه اللي وصلها العلم والدور

وصدري حظنها والفؤاد احتكرها

مسحورةٍ في دم رجال مسحور

لين القبور يطيح فيها ذمرها