يالله ياخالق ديار فسيحه

يامن له الجا في حدوث المصايب

يارب صبر من عيونه جريحه

اللي بنصف الليل صوته نحايب

وأسباب ما لاعه علوم صحيحه

شيخ خذيته عزوتي في القرايب

كلمة نعم من شب صارت منيحه

وبقت معاه الين ماصار شايب

كريم سبلى في الليالي الشحيحه

سلالة الشجعان وقت الحرايب

تبكي عيوني سالم في مطيحه

أبوه مسعود عريب النسايب

يوم الفقر راعي أربعين الذبيحه

ماحد فعلها غير راعي الركايب

ويبكي عليه اللي يدور نصيحه

دين يقول الصدق والصدق صايب

شجاع قوم مايحب الفضيحه

مايفضح الملتاع وقت الطلايب

يارب يامعبود وسع ضريحه

مادام في دنياه مؤمن وتايب

جاك الكريم اللي فعوله صريحه

يحب مرضاتك ويرجي الوهايب

أغفر ذنوب أنسان جاك وتبيحه

عمي وأفاخر به ولو كان غايب

وفي جنة الفردوس بيت يريحه

ومن يطلب يارب ماهو بخايب

وختم الكلام أقولها بالفصيحه

صلوا على سيد البشر والحبايب