الجرح مهما زاد نزفه ولوطاش

ماأسميه جرح ولو دمه من عروقي

ومن قالي إسمه جرح بقول له ماش

بينه وبين الجرح عدة فروقي

مدام عوقه زال بضماد وبشاش

في نظرتي ماهوب جرحن وعوقي

الجرح هو اللي عوقه يجيك بالجاش

منه المعاليق يغشاها فتوقي

الجرح ياجاهل ولوصاحبه عاش

يبقى لتأثيره وسوم وحروقي

مهما تحاول منه تسلا وتنحاش

وتقول من طاريه يانفس روقي

تصحى هبوب النود ذكره وتنداش

كن الهبوب تقول يانفس فوقي

ذي نظرتي للجرح وهجوسي عطاش

وإليا ضمت ميرادها في خفوقي

هذا اللي يسما جرح فتاك لاناش

رايي وإذا ابديته من أبسط حقوقي

فكم جرح مكني ولاحصل إنعاش

يحير دمعي منه في وسط موقي

ومن قال جرحه طاب لاضمد بشاش!!

أبا أسئله وشلون أضمد خفوووقي؟؟!