الله يزينها على مانوده

وتزين خطرنا ونسلم من الضيق

اللي يصدر عارفٍ ويش عده

واهل الركايب للحمل ماهي تطيق

اما لقو حل ومشو في مسده

ولا شعبنا ركابهم بالمطاريق

قولة لاترخي حبلك ولا تشده

تعمي حكيمٍ عارفٍ بالطواريق

وده يشده بس ماهو بوده

ويخاف لا يرخي وتاتي سواحيق

الحمل مايل والبلا فالاشده

ويامرخي شدادك تراها تزاليق

دام الجمل في مبركه لا تهده

واقطب شدادك قبل ماينشف الريق

اعرف طريقك والسنع لا تلده

وجنب طريقٍ مسلكه ماهو يليق

ماتاتي الراحه سوا بعد شده

ولولا الشدايد ماعرفنا مطاليق

شيٍ يصير وشي حظك يرده

وشيٍ علئ ماقيل حظ وتوافيق

وشيٍ يحدك وانت شيٍ تحده

وشيٍ تجمع لك وشيٍ تفاريق

اللي بداك بطيب بالطيب بده

وماء وجهك احفظ قيمته قبله يريق

لاتسوم وجهك عند من لا يعده

خلك عزيز الجاه بين المخاليق

والمحزم اللي نصبته دون عده

لا تحتزم به في نهار الملاحيق

ترا الليالي دايمن مستعده

واللي غفل من وقعها لازم يفيق