الليالي مظلمه يامدورت النهار

والمساري كايده والثقال حمولها

ماتعودنا نمالي ونسمع للصغار

دامها كبرت عليهم صغار حلولها

بركوها واعقلوا هرشها جنب الحوار

والذلول اللي سرت باسمها صيحوا لها

الحقايق لقحت حلها مدري ضيار

واللقايا كنها بالهدير فحولها

والثنايا شدو اشدادها عكس المسار

لين جات من التعب راكزات ذيولها

مادروا بسنوعها واجبروها بالقرار

ليتها سلمت مخاييلهم وسيولها

ربعت لكنّها ربعت والجو حار

واصبحت بارضٍ دهر عقب زين سهولها

يامقاصير العمر ياطويلين العمار

وش جنيتو من هناة السنين وهولها

من زرع له سدرتن مالقئ منها بوار

والله انها شجرتن طيبن محصولها

ومن زرع له حنظله لا يدور للثمار

لو يسقّيها عسل ماطعم معسولها

لو تمايل غصنها واعجبه زود الخضار

والله انها حنظله لو تزاين زولها

الغشامه والله انها دمارٍ في دمار

وابتلينا فالمقرد وصغر عقولها

والامور الكايده مالها كون الكبار

الرجال اللي يعجبك جزيل فعولها

سلموها الشايب وجنبوها ياغمار

والله انها طولت مالنا في طولها