الموت لو يقدر المخلوق تأجيله

ما كان عين تبكي فرقا حبايبها

صحيح من قال يا دنيا من أنتِ له

دنياه من واقع الحكمة يخاطبها

ودنيا العنا دوم من طلعه لتحويله

وأظن با أموت ما صفيت مشاربها

شّيبت ما ارتحت لا يوم ولا ليله

يا الله عسى خير ماضيها عواقبها

وإن كان بقيت كذا والميله الميله

والساعة الواقفة دارت عقاربها

أفضل الموت ولا حملي أشيله

ولا اتشمت على نفسي قرايبها

والله لو أقطع لحم يمناي وأشفي له

ما أكلم النذل في حاجة يمن بها

أزين لي أصبر على الحاجة ولا أجي له

ماني بمتحمل كلمة يزل بها

من يوم ولدت به أمه ما وفى كيله

ودنياه ما شيّبت راسه مصايبها

والصيف ما غرني برقه ولا سيله

ولا كل برق تشوف العين يعجبها

برقٍ على ديرة المقفين ما أخيله

لو يذبح الجوع مالي ما رعيت بها

النفس تبغى بعض الأشياء وترفي له

ويحدها عن صبيّ العين حاجبها

ولا أعيل على الرجال ولا أقبل العيله

والرجل عن ديرة الشبهه مجنبها

واللي حكى في قفا الأجواد ما أصغي له

لا بارك الله في النمه وصاحبها

ناس يخلقون رأس العلم من ذيله

يا رب تجعل جهلنا من مكاسبها

وإن سمعوا العلم حطو فيه توصيله

وعلى كلام القفى تشعب ركايبها

واللي يسد اللزوم أقفت مراحيله

ولي غدى ذيبها لعبت ثعالبها

اللي زرع يأكل الراقد محاصيله

والسارية حبلها من فوق غاربها

ورأس الجمل صار مثل أيديه ورجيله

والبل خذا راعي المعزى محالبها

والعلم لعبوا بصاحينه مهابيله

وراعِ العصا قام للباطل يمد بها

عكازة الشور في برزة حلاحيله

أمفرقت شمل ما الجمعة تناسبها