الوقت يمضي والليالي مدابير

والجسم من زود الهوى ((هد حيله))

تقبل على هموم بقعا طوابير

وتشب صدري مثل شب الفتيله

واصبر واقول بصمت((يالله عسى خير))

يمكن مع الأيام تاتي قليله

اشوف ناسٍ نعبوها ((طراطير))

تبغى تطيح براس شاعر قبيله

قولولهم بدري عليهم ((وبكّير))

اهل القلوب((الحاسده والرذيله))

مهما يطير ((البوم))ويطير ويطير

((بيني وبينه الف ليله وليله))

يامسويٍ حالك مثل سالم الزير

((الله يرحملي زمان الجليله))

وانا شموخي ماعلي منك ياصغير

((ادوس راس اللي نواني بحيله))

ومن لا يقدر مالقى اي تقدير

تلغيه كل الناس باسرع وسيله

وانا ماقول اني ((انا حضرة جرير))

لاشك لي موقع ورايه طويله

وانا ترى ماهمني((نافخ الكير))

همي مع اللي له رموشٍ ظليله

اللي غلاها فاق حد ((التعابير))

((مهره أصيله ايه مهره أصيله))

اللي لمن قالت((ابي))قلت بيصير

تامر على اللي بس تبغى الكحيله

ياويل حالي كل ماقامت تسير

((لا والله الى ويل قلبي ياويله))

تقول كنها من على القاع بتطير

((ماتعترف بسلوب لفه وميله))

وأن سولفت ياناس وشلون باصيريفقد

((ابو محمد))بقايا دليله

ويضيق صدري لين ((افك الأزارير))

واسرج خيول الفكر واجلب حصيله

واجيه انا وحروف شعري مسايير

نروى ونروي كل عرق ومسيله

إذا زهمني قلت لبى وياخير امر

ولو جات السوالف طويله

لو كنت انا وياه ضمن المشاهير

((والله يضيع القيس وتضيع ليله))

ولو كان تدخل في سباق الأساطير

((فازت فقط باالثام راقي وشيله

((وانا بفوز بحرفنة شاعرٍٍ غير))

حرفٍ سلس واخرى حروفٍ جزسله

طغت على كل البنات الغنادير

((أم الحلا وأم الغنج والجميله))

الشمس تبكي له مع حزة عصير

والليل سامر في روابع جديله

والثلج ذايب سايح بجمة البير

والنار داعبها نسايم عليله

يسعد صباحه كل ماغرد الطير

ويسعد مساها كل يومٍ وليله

هذا الهوى والحب مافيه تفسير

تجعل عيونك من دموعك ذليله

اقولها من قلب صادق وبضمير

الله لا يقطع خليل بخليله