تحلينا بصبر أيوب والتقوا عمل لتقا

من دون الصبر مافيه شيٍ في الحياه يطاق

رضينا مارضينا نقبل الواقع ومانلقا

ولا ظلما وضيق الا يجي بعده نفس واشراق

وبامر الله وتدبيره وحكمه في البشر وثقا

ولا غيره طلبنا رحمته والعفو من لعماق

ويلزمنا التحمل والعزوم اللي بها نرقا

وهنا ربٍ كريم ينفس الكربه على من ضاق

ويش أكبر معاناتك لمسرا الليل والملقا

يالله بالسلامه وانت للي مشجنك لحاق

انظر للسجين اللي يعاني فعلتٍ حمقا

وفيه من القضايا ماوراها كون قطع اعناق

وانظر للغريب اللي قضى عمره وهو يشقا

بعيدٍ عن هله ويعيش في وحده وحرق أشواق

وصبرنا بعد غالين المقام لوعة الفرقا

وتحملنا وعانينا وقاومنا حزن وفراق

مسانا في تخيل والصباح نلاحن الورقا

حن نسجع مع انفسنا وهي تسجع على لوراق

وهي راحت وحن بنروح ماشي في الزمن يبقا

سوا ماقدمه لنسان من دين وعطا وأخلاق