سلام تسليمة وفاء ترقى على حد الغمام

من شاعر ٍهاضت قرايح فكره وجاته اشمام

يا مرحبا ترحيبة ٍباسمي وباحروف القصيد

ويا مرحبا واهلين عند اللي لهم قدر ومقام

ويامرحبا ترحيبة ٍ ,تكسى بعود وزعفران

ويامرحبا ياروسنا يامرحبا ياشيوخ يام

اللي لهم ذكر .. جميل ..اللي لهم فعل جليل

واللي يفكون النشب واللي يحلون الخصام

راكان بن حثلين كساب العلوم الكايدات

له صفحة بالمجد وافعوله بها تذكر اجسام

شيخ ٍ رقى بالمرجله والفعل روس النايفات

ويفرح به اللى من ورى القضبان محكوم عوام

به حنكه .. وحكمه لاجات المعضله ماهي تكود

ويزهاه بشت يلبسه نسل الشيوخ ابن الكرام

الله يديمك ياولد خالد لنا درع حصين

لأنك الى من ضاقت القاله بيمنانا حسام

ويا فيصل ابن شريم .. راعي الطايله سقم الحريب

ابو محمد شاهر ٍ بالطيب في ذروة سنام

زيزومنا.. هداج تيما ناقل الحمل الثقيل

يذري.. ذراه .. الى وزاه اللي عيونه ما تنام

شيخ الى منه لفانا ذكره ..ينومس نباه

وجاهه وماله يعتق ارقاب بعد ماهي تسام

الله يمد سنين عمرك يا حزام ما يبور

لانك الى من كبرت الدعوى رفيقك ما يظام

يا شيوخنا والحرف في طاريكم ايشوق البشير

والمدح يزهى من زهاه ويثبت الفعل الكلام

انتوا .. الرجى ..وانتوا .. ألامل .. وانتوا هل الرأي السديد

وانتوا .. لنا متون ٍ تذرينا .. بصكات الزحام

يحجي حجاكم … من هموم الوقت الاقشر والظروف

لاثقلت وكادت .. ورى خشوم ٍ مشى فيها العرام

يا شيوخنا وانتوا عيون ٍ تعرف بجمهاة يام

والعز يبقى.. رسمه .. وذكرة.. ولله الدوام

والشعر يفخر لا كتبته فيكم ويرقى سنود

ويشرف الشاعر قصيدة تجمع ثنين عضام

يامرحبا باسم العروق وباسمي وباسم القصيد

ويامرحبا عند الشيوخ اللي لهم قدر ومقام