عـلى حـد الـمفارق باصرخ بصوتك واناديني

وإذا فـزّيت لـه ثـم أرتـكزت باقول مت حرّه

أنــا مـاهمني بـاعيش حـتى لـو نـسيتيني

ولـو قـلبي يـبس .. بيجي غلا ثاني ويخضرّه

مـن فـراقك بـكيت ومـايخصّك .. شي يعنيني

أموت من البكا عاااادي .. ولا أرجي عطف مغترّه

أنـا شـوقي طـفل حـنّان مـن رحتي مأذيني

عـفسني لـعنبو داره عـجزت أفـتك مـن شرّه

نـهيته عـنك كـم مـرّه .. عـنيد ولاتـلوميني

تـرانـي بـاذبـحه وأريـحه وأرتـاح بـالمرّه

وأبـنظم لـك قـصيده .. تـشتكي منك وتبكّيني

وبـاقراها وأجـاوب عـنك نفسي .. عاود الكرّه

وبـاكـتبها وبـاوزنها بـعمري وإن كـسرتيني

بـحاول مـرّه وثـنتين .. إلـين أبـرّد الـحرّه

تـرا لـولا قـصيدي مـن تـكوني يابعد عيني

تـرا كـنتي ف(جرّه) جاك شعري وأظهرك برّه

تـبين الـحق ؟ أحـبك .. إيه أحبك لو جفيتيني

ولـكن كـبريائي وسـوس بـقلبي يـبي يـغرّه

وحـتى الـحزن مـن بعدك توطّاني وشمت فيني

وقــام يـقطّع بـقلبي عـلى هـونه ويـجترّه