على حكم ربي والقدر كلنا راضين

له الحمد ماهمّل من المزن بقنوفه

له الامر باولها وله الامر يوم الدين

وبامره تحج الناس للبيت وتطوفه

بشر ماعرفنا وين مصلوحنا من وين

وتجري بنا الاقدار والوقت وظروفه

ومن عقبها ياهاجسي والعرب ممسين

تخير من القيفان من كل معسوفه

لمن العرب نامو تجيني الهجوس بحين

توارد علي من كل الاصقاع محذوفه

تقل فوق صدري حط مبناه سور الصين

وعيني تقل فيها قذاة ومطروفه

سبب هاجسي ذا الليل ما جا لبو شاهين

عسى عنه صكات المقادير مصروفه

حزام الظهر سيفي على منكب اليمين

وياكم يرد الراي لي قبل ما شوفه

وسلامة محمد عندي اغلى من العينين

عليك وعلى سرحان حتياه ووصوفه

فلك الحمد يارب لنا سلّم الاثنين

من الحادث اللي ارتاعت الناس من شوفه