عالم ن من رموز الفخر يوحيه وجهك

ويتجلى شموخ المجد بااقصى خفاك

ويصغر العزّ لا منّه غدا جنب عزك

ويتفيّا بظلك .. شيخ قوم نصاك

وتصغر الكايدات المعضلة تو عزمك

وينشرح باله المظيوم ليما نخاك

أنت لو شفت حال الناس في يوم دفنك

وشفت حالي وأنا اللي قطعةٍ من عضاك

غيّمتْ في سمانا غيمة الحزن بعدك

وامطرت .. دمعها دمّ ن تغشّى ثراك

آتصبّر .. واجمّل حالتي عقب فقدك

عروة القلب تِلّت من حشاي بعزاك

وآتصبّر .. واسلّي نفسي بشوف رسمك

مثقل ن كاهلي حمل ن تركته وراك

أنت مثلك ترى ما مات حي ن بذكرك

شاع في الارض طيب الفعل منك ووفاك

وأنت مثلك ترى ما مات حي ن بنسلك

لك عيال ن تغذّوا في دميهم غلاك

لو طويت الوسيعة ما لقيت أبّ مثلك

عزّي أنت وعزاي وعزوة ن لك ضناك

ألْبِس العز من ماضيك وامشي على اثرك

وامتطي صهوة حصان ن لجدّك واباك

كل ما قلت ما يوفيك يا بوي حقك

واحد ن .. من تلاميذك يجود بعطاك