ماني بحساد ولاني بشمات

وماني بناقل الحكا والنميمه

حشمة نفسي من علوم السفاهات

وعزيت نفسي بالنقا والحشيمه

اطلب من الله ستره بكل الاوقات

وادخل عليه من الردا والظليمه

وماعندي كنوزٍ ولا به تجارات

مستغنين بالله وذكره غنيمه

خضت التجارب والتجارب شهادات

ودروسها تبقى معك مستديمه

ونجحت فيها بعد عدة خسارات

خسارةٍ تفرح والاخرى اليمه

بعض العرب خليته اغلى من الذات

وعند اللوازم باعني دون قيمه

وبعض العرب ماعده ان جات وقفات

واثره عجب عينك وعوق لخصيمه

غرتني بشوت العرب والعمامات

وهقيت فيها بالظفر والشكيمه

وخابت هقاويي ودبرت بسكات

من بعد ما شفت العواقب وخيمه