بديت باسم الله علاّم ماكان

الواحد المعبود ربْ الجلالي

الخالق البارئ ورزاق الانسان

ربٍ عليه الرزق والاتكالي

من بعد هذا ببدع الشعر قيفان

وبرتب الفكره بيوتٍ إجزالي

همٍ بقلبي شايله قدله أزمان

وأكتم همومي والفرح ما طرالي

بسّطر همومي وبنخى بليهان

اللي يشيل الحمل شيل الجمالي

أنخى ملكنا راعي القدر والشان

واطلبه بالله يستمع في مقالي

رجلٍ خلقه الله احاسيس وإيمان

رجلٍ خلقه الله لشل الثقالي

رجلٍ يشوف الشعب في عينه أخوان

لافرق بين المشرقي والشمالي

رجلٍ علومه كلها فعل الاحسان

والكايدات تصير عنده إسهالي

ساس الفخر والعز والعلم نيشان

طيبه مع عطفه يهد الجبالي

هذا ملكنا مثل همال الامزان

عشنا بظله نرتقي كل عااالي

وانخى ولي عهده وعزه إكحيلان

اللي فعوله شامخاتٍ طوالي

لامن نطقت اسمه يجي الغيم هتان

رجلٍ رقى بالمملكه في العلالي

سلطان ياسلطان سلطان سلطان

كررتها والطيب جاله مجالي

انخاك ياسلطان ياطير حوران

يالقرم يالحلحيل حامي التوالي

في عفو يشلمنا مساجين نجران

ونفرح وندله عن صّدوف الليالي

أولادنا مابين ضيمٍ وحقران

وهمومنا صارت كبارٍ إجلالي

والورده اللي ذابله وسط بستان

كلٍ دعسها ضيم ياوجد حالي

إمن اول أسقيها وَنَاظر بالاعيان

مطلاعها والشوق غطى خيالي

والعيد قرب نحلم بشوف شيبان

ونحلم بشوف عيالنا والاهالي

قلها يابو متعب تصاريح وإعلان

عفوٍ ٍيجمع كل غالي بغالي

وإطلق سراح اللي به هموم وأحزان

شفقٍ على بيته وشوف العيالي

وشفقٍ على شوفة عجوزه و ولهان

وشفقٍ على ربعه وزايد هبالي

وختامها صلو عدد مالقمر بان

على النبي وعداد وبل المخالي