اغلى المحاريف مفتوله ومنقوضه

تسري بليلٍ ظلامٍ بارقه ناضي

تسري حروفي على مسرى سنا نوضه

يالله تثمن تعب رجلي ومركاضي

صوبك يابو الاختبار اللي معك خوضه

عساني انجح واعود خاطري راضي

شفني تعنيت لك ياللي ورى الروضه

واهلكت كل اللياقه لوني ارياضي

يااجمل من اصل الجمال وصيحة الموضه

ويااروع من اصناف ماسٍ بالدجى تاضي

لاهي باللبيع في الاسواق معروضه

ولاهي بتعطى لمن جاها بيعتاضي

يااحلى من السكر المخلوط بالبوضه

يااقسى من جروح طعناتٍ لمقتاضي

ياراحة المعسر اللي سدد قروضه

ماعاد يطلب ولااستدعوه للقاضي

يانسمة الورد واليشموم في روضه

يافرحتي وابتساماتي وانا راضي

ان كان روحي معك بالحب محظوظه

ماني براجع من ديارك على الفاضي

غير انتبه للظمان اللي كسر حوضه

ينبيك عن مايقوله فعله الماضي

ماني بحب الغلط ولااقبل الفوضه

ولااحب انا اقول كلمه مالها حاضي

ومقردٍ بين خلق الله مبغوضه

ابعد عن دروبهم واخشى التعراضي

فان كان روحك علي بالحب مفروضه

اسمح لي استاذن .. ودور على فاضي

معاملاتك بهذا الشكل مرفوضه

عسى العشم مايعود منك مغتاضي

ولاتراني بسجل فيك ملحوظه

ثم اشتكي قسوتك للشيخ ابن ماضي