هيهات ياوقت رحل رده اليوم

هيهات يالخلان وقفت سلومي

من اولاٍ كنا وهالحين ذا البوم

يرفع بصوته فوق عالي الرجومي

اقفى هوانا قفاية الحر بغيوم

والا مثل وبلٍ قفته السمومي

اقفيت منه خوفتي يلحقن لوم

امسح دموعي العين باطرف كمومي

ذكرت منه كلمة قالها دوم

لاتبتعد مهما حصل من علومي

هو ماحفظها ناسي العهد وسلوم

وانا بعد طوّفتها ليه قومي

ذكرى محبتنا تجي دايم الدوم

الجسم من حبه تقول محمومي

ريحه نفل ومخالطه عطر مشموم

وهرجه عسل في در بكرٍ ردومي

عينه كما عين الوحش لادرج الحوم

حقق مطار اللي خريش وعزومي

فيها من العفري حلايا بها كوم

لاذاره القناص قبل العتومي

وين الرفيق اللي يجي منه بعلوم

ويعطيه من عندي حمايض علومي

يخبره عن سباح مايعرف يعوم

بغبة بحر طاشه عليه معدومي

اما يجي يعطيه له ظرف مختوم

والا يسيبه في رجا الله يعومي