وجد حالي يوم قلبي تمزّع مزعتين

مزعة ن راحت ب الاردن والاخرى في مصر

وجد من حدّوه قوم ن ولا حصّل عوين

لا سلم عيب القفيّا ولا عيّن نصر

أو وجود اللي حدتْه الليالي والسنين

مصغر ن ما لحق صيبه على تالي العمر

أو وجود الشايب اللي يهجرع بالحنين

حاسر ن ما عاد شلّتْه رجله مَ الخطر

أو وجود اللي خذا الهازلة عقب السمين

ما درى انّه هالش الاّ عُقُب ما انّه طِمَر

أو وجود الجاني اللي وراء باب ن سجين

كل ما جا الليل هلّت عيونه بالعبَر

أو وجود الشاجع اللي مكتّف باليدين

في الصميدع بار وقته مع حظ ن عَثَر

فيا الله يا مطلوب يا ربنا بك نستعين

كل ما ضاقت علينا نعزّمها الظفر

رُدّ ناصر هو وفيصل علينا منعمين

يا كريم ن باامره الفُلْك تجري في البحر

يا عنيدي ونا اخو لجثل اسرج مهرتين

غيّب الهاجوس عنّي على جال النهر

لابتي دعوى سعد يام والعلم اليقين

ترتعد منهم كبار المنايا والقْدَر

وآل مسرع في الملاقاة ربعي الاقربين

نوّة ن فيها الرعد والصواعق والمطر

وآل ناجي يا ليوث الوغى سيف اليمين

أحتزم لي جا المهمّات بحزام الظهر

ختمها صلوا على الهاشمي يا سامعين

محمد اللي ربنا جاعله سِيْد البشر