يالله ياللي بيده القدر والقضاء

يعلم غيوب الناس لو يكتمونها

بسط سبع واعلى سبع بأمره وقدرته

ويعلم بما فيها ويعلم كنونها

خلقنا من آدم لين كنا ولم نكن

وليراد شي قال له كن بكونها

خلقنا وفرقنا شعوب وقبايل

وفرق لغاها والمذاهب ولونها

سبعين فرقه مع ثلاث عددها

الله خلقها والعرب يعرفونها

يفوز فيها فرقه ليس غيرها

في جنة الفردوس هم يارثونها

هم الفرقه اللي صار طاها شفيعهم

ذبلا شفاياها وخمصاً بطونها

وهم اللي على الارياك قيل انهم ارتكو

وماهم رحيق بكاسها يشربونها

وهم اللي مع الاشرار كلن يعدهم

ثم زاغت الابصار لاينظرونها

وهم اللي يودون الامانات لأهلها

ولا بدلوا فيها ولا ينقصونها

وهم اللي مناقبهم تبين دليلهم

ولا بد لاهل العلم مايدرسونها

وكما قاله الله في كتابه وبينه

يموت الرسول وسنته يفهمونها

وانا في كتاب الله قريت وعرفتها

ولا يمكن ان تقرون ثم تنكرونها

وعندي لكم ياطالبين النصايح

نصيحه وفا لعلكم تحمدونها

ترا المعاصي من ثلاث تكونت

تكفون يالظفران لاتقربونها

الكبر وابليس تكبر ولا انتصر

حيث انه ابى من سجدتاً تركعونها

والحرص ساق آدم على حب شجرتا

قد قال رب البيت لاتقربونها

والحسد بين ابنا آدم حط فتنه

وخلا بعضهم ميت من طعونها

انا ألوم من يرضى لجهالة الخطا

عليه المشاكل دايم يجلبونها

وانا ألوم من تشكي عوانيه زلته

هو يجيب زلات وهم يسمحونها

وأنا ألوم منهو خاين في رفاقته

لما شاف غرات الرفاقه يخونها

وانا ألوم من يكثر على جاره الأذى

محى الله من يرضي على الجار هونها

وانا الوم منهو دايم في رفاقته

لسانه كما ميشارة يفتقونها

وانا الوم من يصلح وربعه حرابه

يصالح رجال لابته يحربونها

وانا الوم قوم مايزبن جويرها

سلوم القبايل بينهم يقطعونها

وانا الوم من يبغي مناعير لابته

تفشل وهو يعتز لو كان دونها

وانا الوم من يخطي ويبغى خمايله

تمضي على العراف مايعرفونها

يبا المدح له والنعم له والمقال له

وعوال الرجال حقوقهم يحتمونها

وانا الوم من بيته رفيع ونزله

ينّزل معاليق هله يرفعونها

وانا الوم من يرفع بيوته مغشه

وفيه اخبراء لو غشها يفحصونها

تكّلف وخسر الحال والمال والحياء

وعود على دار هله يسكنونها

ومن بعد ذالي في الرجاجيل نظره

ولا بد ماذكر نبذه من فنونها

الاوله من طاع ربه ووالده

وقاوم فروض الله وتمم ركونها

والثانيه من كان ساسه معّرب

ترا البيوت بساسها يرفعونها

والثالثه من كان تعرف شجاعته

وله هيبه عند العدا يرهبونها

والرابعه منهو يعرف القوادي

يخلّص عقدها كل مايشبكونها

والخامسه من عز نفسه وصانها

ولا هانها لاهل الردى يطبعونها

والسادسه منهو صدوق لما حكى

وله كلمة عند العرب يقبلونها

والسابعه منهو كريم لما عطى

وله كرمة جزاعها يلحقونها

والثامنه منهو حكيم برايه

ولاحجتة ليجابها يفلجونها

والتاسعه من يرتكي للنوايبص

لما عجزوا اهل الدون ماينقلونها

والعاشره الاخلاق والحلم والوصل

وضم المراجل بالنقا يكسبونها

تهيضت واللي هاضني كل ماحصل

مجالس رجال وافيات فنونها

يقولون حن نبغى القصايد تعدها

وانا ماأقدر الزمها وهم يطلبونها

علشان ذلك هضت غالي مثايلي

عساهم الى فطنوا لها يشكرونها

نقدت ونصحت وريت واقر واعترف

وعقلي يقول ان العرب يرغبونها

وانا ماأعتبر نفسي نزيه عن الخطا

خطاياي لابد العرب يكشفونها

ولاكني لاسير فيها تعمدا

ولاعاتب العقال لو ينقدونها

بدينا بذكر الله وانا باسمه انتهي

وصلاة على اللي سنته يتبعونها