يالله يامحيي هميت الجرومي

ويامشافيٍ ايوب من بعد بلواه

ويارازق النعاب دود معلومي

لين استعد وعادت امه مع اباه

ويامنجي ذا النون من بعد عومي

في بطن حوتٍ وطبقات وظلماه

ياخالق ادم وهو كان معدومي

ومنه خلق حواء سكينه وتدراه

ويامن له تصلي العباد وتصومي

وتحج وتطوف الحرم تبغي ارضاه

انت الكريم اللي غفور ورحومي

وانت العزيز اللي المخاليق تنصاه

تقبل دعاَ اللي ساهر ماينومي

يدعوك يرجو رحمتك لنك مولاه

أتعينه بالدنيا بقو العزومي

وتهديه درب الرشد والخير ينصاه

وتنجيه من نارٍ ولفحة سمومي

ودرب كما الشعره نجح من تعداه

عينه على الجنه برحمتك دومي

وعزي لمن نوقش حسابه ياعزاه