يالله يا منشي السحاب المزابير

نو ٍ تراكم مع شعى البرق مطار

تفرج لمن حالت عليه المقادير

جسمه بدار وقلبه معلق بدار

نعيش غربه لا ولا في الأساطير 

غربه وصارت والسبب ذنب ماصار

حكم ٍ على بعض الوجيه المسافير 

مثبت ٍ في جبهة الحاضر بعار

حكم ٍ مسمر والكذوب المسامير 

تبرير رغبات ٍ ولعبات شطار

رغبات عجزت لا تنوش التبارير 

ولعبات تخلق من عدم كل الاعذار

ناتي الديار تقول كن حن مسايير 

هلها وصرنا للاسف خلف الاسوار

ناتي لها مثل الجنود المغايير 

وجه السما من خلفنا عج وغبار

ونروح منها لاعنين المشاوير

كن بعضنا يسحب على وجهه النار

نمشي طريق ٍ قاعها كالسواطي

رحمر ٍ من دمينا مثل ثوب جزار

ارواحنا تقطف سداد لفواتير 

ظلم ٍ / مع سابق ترصد واصرار

لكن نسير وما نهم المخاسير 

لعيون دار ٍ نفحها عطر وازهار

ولعيون ومضات النجوم المناوي 

رنتبع سناها ونتعلق بالاستار

ولنا بوقت اهل ( …. ) والزنانير 

صرنا مابين النار يا رب والغار

وقت ٍ يسمونه بوقت ( الهوامير ) 

وحنا على بابك وسترك ياستار

نعوذ بك من وقت طلعه مواقير 

بالهم .. والمر المعتق له ثمار

لقايح ايامه زنا بالتعازير 

وولد الزنا يولد وهو شيخ بيطار

وقت ٍ عليه الخزي عز الطراطير 

وما زاد ميز بين عامر وعمار

فيه الجبان امسى يعد الدنانير

وهو من قبل لو بيع ما جا بدينار

اطلق شنب به من يدق المزامير 

واشجع شجاع اللي تمايل مع الزار

خلا هل الوقفات خلف الطوابير 

وفرخ الهلامه يقدم وفي يده طار

وقت ٍ جحد مجد السنين المدابير 

والحق يظهر لو نوى الوقت بانكار

وقت ٍ يجور ولا يهز المغاوير 

اللي لهم في القمة النايفه كار

مسكين ياللي تحسب انا عصافير 

حنا صقور افعال بالموت تجار

صيدك طيور وحن نصيد الصقاقي 

رما ناخذ الهابي ولا نلحق الفار

حن يام ابن يصبا صقور المحاضير 

وهمدان بن زيد الوفاء / مزبن الجار

اللي لو يحز العظم بالمناشير 

ما خلت / اخوان الصفا / نهج الابرار

وما حن نسوق ان جا الملاقى معاذير 

الا شياطين سرجت قب الامهار

قوم ٍ وقايعها فعول ٍ مشاهير 

في السلم حلم وفي الوغى وقع كفار

ليصاح صايحهم توالوا جماهير

لين الفجوج تضيق منهم والاقطار

من هو يضيق وله ربوع ٍ مناعير

امثال ربعي يام وافين الاشبار ؟

الا من فراق الوجيه المحابير 

بالطيب / منهم بين غربات الاسفار

وفراق دار ٍ لو غلاها محاذير 

اجرمت حب وسرت ما اهم الاخطار

يا شمعدان الشهد / عذر الدبابير 

من ذاق شهدك ما بغى غيرك ديار

قولي لمن يقرا الدجل في التقارير 

الصدق له سقته تغلفه الاشعار

نجران سد ٍ ما تهزه الاعاصير 

ما هو بمأرب يوم ينهد من فار

سلام يادار الدلال المباهير 

سلام يا حره وياديرة احرار

سلام لك ولناحرين المغاتير 

مليون تسليمه لهم سر واجهار

وسلام يا دار الصبايا الغنادير 

اللي من العفه لهم ثوب وخمار

أشرف بنات الارض واطهر قوارير 

تشهد لهم سجداتهم وقت الاسحار

ويالله يا منشي السحاب المزابير

نو ٍ تراكم مع شعى البرق مطار

تفرج لمن حالت عليه المقادير

جسمه بدار وقلبه معلق بدار