ياهجوس الشاعر اللي ماتخيب هجوسه

ورديني جمه المعنى بطول حبالي

شاعرك شاعر يميز هاجسه وحسوسه

وان بغى له فكرتن ياتي بها طوالي

عقب اللي لاورد عد الروا ويحوسه

لايحل ولايعقد ولايجيب جزالي

وعقب اللي مالبس بين العرب ملبوسه

غاديٍ مثل الذهيبه وسط قفرٍ. خالي

احترامي لا ابو راي وخطه مدروسه

مبعد الأنظار دايم يرجح المكيالي

ماحدٍ يطب سوق الكسب دون فلوسه

ومن فهمني رافعٍ له غترتي وعقالي

المعالم بعضها في ذا الزمن مطموسه

تغضب العقال لو ماتفرح الجهالي

والزمن مابين نيبانه وبين ضروسه

غير ابو زيد الهلالي كم بعده هلالي