ياهل الهوى عيني جفت لذة النوم

تشتكي وتبكي والسبب حب خلي

مهما شكيت من الجفا ماعلي لوم

كيف اهتني وصويحبي ما حصلي

يازين مهما صار انا فيك ملزوم

انا الذي في حبكم رحت كلي

محروم منك وانت بالمثل محروم

بس اشتحن لك مثل ما تشتحن لي

اسباب فرقانا زمنا لها القوم

ماسبب الفرقا عناد وتغلي

انا ادري انك يا اريش العين مظلوم

واكبر دليل دموعك الي تهلي

وانا بعد مظلوم لاشك مقسوم

صار الشقا مكتوب ومقدر لي

اقسم يمين اني على طول مهموم

ماشفت في الظهران شئ يسلي

اردد التفكير بين امس واليوم

وابكي واسامر كل نجم مطلي

واجامل الجلاس والسر مكتوم

وارجي عسى ايام المفارق تولي

في خاطري لك شوق واخبار وعلوم

لكم محلك نازح عن محلي

صوتك يعانق مسمعي دايم الدوم

وملازمتني صورتك مثل ضلي

يا روح روحي مانسيتك ولايوم

محبتك مثل الهوى ما تملي

سر الهوى غامض ولاهو بمفهوم

لكن رموزه بالصراحه تحلي

للحب في قلبي مفاهيم وسلوم

والعين لولا نظرته ما تدلي

عقب ابتعادي صار في جوي غيوم

ايش العمل يا ناعم العود قلي

احذر ترى الي في الهوى يقبل اللوم

في جنة العشاق ما يستظلي

ان مت في حبك شهيد ومرحوم

وان عشت ماغيرك من الناس خلي

وافهم تراني عايف لذة النوم

كيف اهتني وصويحبي ما حصلي