قصيدة ترحيبية بصاحب السمو الملكي /الأمير تركي بن هذلول بن عبد العزيز آل سعود نائب أمير منطقة نجران أثناء زيارته لمحافظة حبونا يوم الأحد ١٤٤٠/٢/١٢هـ الموافق٢٠١٨/١٠/٢٢م

يا الله يا خير معبود ومقصود ومنشود

يعلم بما ف السماء والأرض وبحوله فصلها

والخلق في دبرته ممدود من فضله ومطرود

حكمة من الله سبحانه على المعني عضلها

من حبه الله يجعل له لمور سهود ومهود

ويقول خلك هنا وحكم سهلها من جبلها

مالك منافس ولا حاجز ولا حكمك بمردود

رح دربك اخضر وعدوانك ورا ربك خذلها

ومن يكره الله يجعل في طريقه كل مقرود

من حيث ما ادرج مراكيبه عدوه في دقلها

ف الرزق محسود مفقود الامل والحبل معقود

ويقيد الراحله من سوء حظه ويعقلها

من حيث مالد لقيه من حليف الحزب نمرود

ومحجرين العقول فلول تجهر من عذلها

كل المداخل على بن آدم بحكم الله بقيود

اما فتحها عليه وسرته ولا قفلها

يا الله بنصر الجنود ورحمة اللي بات ملحود

وقمعة عداناوقوتنا تبعثر من دغلها

وتحفظ بلدنا ومن قاد البلد بالخير موعود

أبو فهد ذخرنا غيث البلاد اللي نزلها

الحاكم اللي رفع شان العرب مامن مجهود

ومخالفين النظام بمنخل الفطنة شخلها

وكشف لنا الذرب ولي منه ريع ومنه منقود

عالج من أخطوا وخامات التلف عين بدلها

الناس كانوا نهوج ومحسنين الظن ورقود

ماعندهم في زناديق اللصوص ومعتقلها

حتى قدح في خشوم القوم من سلمان بارود

وعلم على نخبة الصاحين والمرضى عزلها

اللي من الناس يبدون الغلا وقلوبهم سود

ويجادلون المراجع والمقالب في عتلها

مثل الثعابين لينة البدن وتحد وتحود

سلم على لحية اللي قبل ما تنهش قتلها

اللي رزم فوق رأس افعى الافاعي زرب وحيود

أنيابها جزها وأذنابها العفنة شكلها

من فسل ماهو بمحتوم ومرسوم ومحدود

يندم على الصنعة اللي من ردى نفسه فعلها

ماعادبه عذر مادام الخطأ واضح ومشهود

ومن لا يسدد مخالفته قعد يدفع دبلها

الحزم معدود ب أمر المعتلي والعزم معدود

في ظل من يستر الشقراء ومن يدرا خملها

وحضرة ولي العهد وجه السعد وعضود وزنود

للعاهل اللي مواردها معادنها صقلها

محمد أدهى العرب واعي وعلمه ماله احدود

معادلات السياسة ف الطوارئ يختزلها

فتح مجال التطور وانحراف الفكر مسدود

المملكة في سرا العالم يمثلها واهلها

الله خلقنا نوادر مرجله ما ننقض اعهود

نرفع مقام الشرف والقاع ما نقطع نخلها

من دون حد الوطن درع وسياج وجسر وجنود

رهن الاشارة وعز نفوسنافي مر اجلها

عدونا يرقع المنهاج مهجود وملهود

ياخذ جزا ما سعابه والسموم اللي نكلها

والحفرة اللي حفر للسوء فيها ربعه اقعود

يزقل به الله فيها مثل م الخبره زقلها

والميت اللي تبنى السم جعل اعظامه الدود

العلقة اللي زرعها واثمرت صده قذلها

يمحق ويطحن ويسحق ما بدا مرمود مرمود

منها ومن قال يكل غيره العلقات اكلها

المعتدي من بلاد الفرس والتتار مقدود

الله يسلط مفاعلها عليها يشتغلها

ما اظن ف المملكة مظلوم ومشرد ومضهود

في عهد سلمان ومحمد ومن ينحو بتلها

أرض بها القادة آل سعود فيها برج ونجود

الله بملح المناقب في مراحلها نحلها

اخوان نوره هل العوجا الأسود البزل تسود

هامات والله اعطاها اطهر بقاعه تحتملها

في كوكب الارض بيرق حكمها ف الركن مشدود

م الله رفع ما يعادلها وبالوزن يعدلها

ايه يا جلال المحازم كايدين الكايد الكود

جيرانها الكايده ما تعتبر كلمة خبلها

يا مرحبا عد ما تنش السحب وتزرجم ارعود

وما شعشعت واشعت بروق الرفايا من شعلها

وما ناح ورق الحمام الراعبي وهبت النود

وماغمضت عين روح الحي من غبطة فتلها

يا اعز ضيف يشرفنا وساس المجد والجود

الدار تقسم يمين ان تركي اغلى من دخلها

تكشخ وتزدان بعطور وبزهور وبورود

وتلبس من أفخر قلايدها ومن أجمل حللها

أرحب وصحبك سمو وقضاه ورتب صف وجنود

الكل دعوة معيتكم على راسه نقلها

محافظ وشيخ واعيان ومسولين وبدود

تثن التراحيب في المنزل وفي ساعة عملها

بروازة ارحب على المدخل عليها نور وعقود

توضي وتلمع من الفرحة وتستشور غزلها

اهلا وسهلا شعار الكل ف الوجدان مرصود

ينبع من قلوبنا اللي غير شوفك ما شغلها

ارحب على طيب وقناد ومثرود ومفرود

وجفان بر وسمن جامد سدر عسلها

ثاروحبونا و بدر ويدمه في نشوة الفود

بعد الحياء اللي برد وبله مقاطنها شملها

وزيارتك يا الأمير الماطر الثاني من الرود

يستقبلك روضها ويذيع بك ساجي فللها

يا حي شوفك تجي وترود ف الميدان وتعود

تجبر كسور النواحي يا معود من خللها

ارحب تراحيب يام اللي تجمل وتحمى الذود

يام خوالك يسرك كل ما جا من قبلها

تركي بن هذلول بن عبد العزيز معزي العود

الفيصلي أخونوره راعي العوجا جملها

يا بحر ف المد يا معنى الوفاء يا الشهم يا الطود

صدق وشجاعةوصبر ومعرفة كفك حملها

واخلاق تفرض مكانك في قلوب الناس بشهود

يا بن الملوك المعظم يا فقلها ياثقلها

امير نجران غالي والغلا سالف ومعهود

منا ومنه ونيتنا يجملنا عملها

يام بن يصبا وهمدان ومكرم برزخ فهود

ما تزعل بن جلوي وبن جلوي يرفض زعلها

سكان نجران حضر وباديه غايب وموجود

تغليك يا تركي اغلى من تعده في مثلها

سمعتك يا سيدي تنساق مثل معتق العود

المجتمع ف المحيط الاستراتيجي نقلها

من جودة العود يبقى ف الغتر من زود في زود

تزيده الشمس واتعاس المشاعر ينتشلها

والطيب يا سيدي ينعش قلوب ويغسل كبود

من الصدأ مثل ماكبدي محياكم غسلها

يا النايب المحترم يا أمير يا أفخم وفد وبنود

أهل الأماره لها وأنت لها ولها واملها

مقولتك يا حفيد العود جعل ايامك سعود

يا الجهبذ الفذ وآل سعود من سادت دولها

تقول نجران له تقدير بالتعزيز مسنود

من قبل واليوم انا طالبك في كلمتك قلها

تركي بن هذلول هرجه نبل بلسم نقد قرهود

تبارك الله الى بسمل وسلم وارتجلها

صلواعلى أفضل من اعفى واحتسب والجمع محشود

في فتح مكه وتمم دعوته وأكمل ثملها