يا موطني لبّيه لبّيه يا الراس

المجد مجدك والفخَر فيك مهووس

اِلْبَس ثياب العز فخْر وتنوماس

ثوب الوطن تسعة وثمانين ملبوس

ثوب مطرّز فايق ٍ فوق الالباس

منسوج بقلوب المشاكيل مقيوس

عملاق ما مثلك علا قُب الافراس

وتاطا على روس المعادين وتدوس

وان واجهَك بعض الصعوبات لا باس

بْكُل هِمّة تاصل المجد وتروس

وسلمان في قلبه يضمّك بنوماس

سلمان سلمان الحزم باري القوس

زعيم الامّة وارث مجده وساس

صميدَع والراس م العزّ متروس

ومحمد ٍ يتنفّسك طُهْر الانفاس

يمضي بعزم وحزم وبفعل مدروس

بين المعزّي وابن حثلين له ساس

انا اشهد ان اللي يعاديه منحوس

وخلْفَه رجال ما تساوى بالالماس

حُرّاسك الوافين بالعز محروس

كل ابلج ٍ دار المعادين عسّاس

ما ينهزع لي قوّس العج فَيْعوس

اللي نواك اب شر من زمرة انجاس

ناطا على علباه ريّس ومريوس

وصديقنا له في ذرى الدار مِجلاس

ويرعى بهيبتنا بعز ٍ وناموس

يا موطني عشقك سما دون مقياس

لك ف الحنايا صادق الحب مغروس

يا قِبلة الاسلام للدِّين نِبراس

وهَدْي الرسالة من تعاليم ودروس

يا موطني يفداك خاين وبلاّس

لا تلتفت للّي حكى فيك بِهْبوس

محشوم والله من عبَث كل الادناس

اللي تبيع أوطانها ب حفنة افلوس

هات القلم واكتب وصاتي بقرطاس

راسي وانا نفديك لي غِلْيَت الروس