في عطلة الجمعه نوينا المراحي

يم الديار اللي مطرها جديدي

نحب مرتها لو مابه صلاحي

من فوق مايطوي القفار البعيدي

خذنا نواقصنا قبل يوم راحي

وظهر الخميس محركين الحديدي

نبغي الربع وندوج بارض سماحي

انا وخويي لاعدمته عضيدي

ينام مثل الذيب وامرار صاحي

وامرار يرفع صوت كنه تغريدي

والوقت عجه كنه وقع الرماحي

ضربه على النيسان كنه الثميدي

ورحنا على خطٍ بجنبه مساحي

للي يعرفه كنه وصف الجريدي

نبغي المعزب دون كل المشاحي

على الوعد جيناه قرم حميدي

بقوز يسمى عند نقل السلاحي

في ساعةٍ يعرف الرجل الشديدي

خلوه مبهم ياطيور الفلاحي

جعل الحيا يسقيه وسمٍ مديدي

وفي ليلنا جانا الخوي واستراحي

وشار بمبيتٍ حيث رايه سديدي

وبعده مشينا وحن باول صباحي

نبغي ندوج بشق نوعه فريدي

شُربه ملاح اسين ليته قراحي

قاعه على منهو شواويٍ بعيدي

ودجنا على عدٍ شرابه ملاحي

شرقٍ من ام ثلوم للي يحيدي

ومنها لبو كوله ومسلم لاطاحي

وشرقٍ تعديناه عشر وتزيدي

اربع مية كيلو مشينا النواحي

بارضٍ خلا ماداج فيها البليدي

وفي غرق عرقٍ ريح زهره لافاحي

يشفي خوى راسٍ مريضٍ عنيدي

رمنا المبيت وزان وقت السداحي

مع النشاما دون بغضٍ وكيدي

دله وفلِه والمزح المستباحي

والذيب يشغل بالعشاء والمزيدي

وبليلٍ تشاورنا قبل الانسداحي

على النكوفه بعد راي العميدي

وفي دربنا رزاق عكُف الجناحي

جانا برزق انواع من كل صيدي

ياهيه واسمع وانتبه يامواحي

ماني بمن يمدح على همشة ايدي

مانمدح الا اللي كفو للمداحي

هادي بن خالد جعل عمره مديدي

والا محمد حاز كل النجاحي

هديب شام وفيه صمله وجيدي

معربين اجدود ماهو مزاحي

تذكر فعايلهم قريب وبعيدي

صبيان ضرفاسٍ الموت الذحاحي

مرٍ على العدوان سيف حديدي

ذا علومنا جعل العدو ماستراحي

وصح الله الساني على خطة ايدي