غيم سماي وحنت رعود غيمه

وهلت سحايب غيمته واحية الروح

وغنت طيور الشوق قصه قديمه

من يوم شفت الغيم وبروقه تلوح

عاشق وعشقي عايش في نعيمه

وبنيت من عشقي بساتين وصروح

وغنايمي واجد يامال الغنيمه

والحظ مغنيني ولاني بمشفوح

واخترت من بين البني العظيمه

اللي وصايف حسنها تعجز البوح

آية جمال وفوق هذا حشيمه

وفي حبها قلبي ضحيه ومذبوح

قصة غلا بين النديم ونديمه

عيت معالمها من الخافق تروح

يوم الليالي في هوانا كريمه

كان اللقا مسموح والشوف مسموح

قبل المفارق والظروف العديمه

وقبل الغياب اللي علي غيرمصلوح

من قبل ماتصبح ضلوعي هشيمه

من جرة الونه ومن كثرة النوح

كنا معئ وافراحنا مستديمه

واليوم يبكيني غنئ نايح الدوح

احلامنا ماتت بفرحه يتيمه

وصوت الامل من صدمته صار مبحوح

انا الشجاع اللي رضئ بالهزيمه

لو انتصاري في يدي قبل مايروح