قلبي تولع في هوا ناعم العود

غروٍ صغيرٍ باول العمر توه

غيره له حدودٍ وهو ماله حدود

مايستوي غيره وحضرة سموه

ينقص غلا غيره ولكنّه يزود

وله فالحشا قصرٍ سكن في علوه

غيره عهوده كذب وعهوده عهود

وعاهدني عهود الوفا والمروه

بدر التمام اللي علئ خده ورود

انشهد انه طب قلبي وسوه

العين بحرٍ من سبح فيه مفقود

واصبح ضحيه لونه اللي يتوه

والصدر كنه راعي الجود بالجود

اللي يزيد الجود من خوف شوه

والخصر فقره من غنئ ردفه العود

اللي بفقر الخصر كنه ينوه

زينه عذاب عيون وقلوب وكبود

وصفه عجيب ووصف غيره مشوه

خطاه في عيني صحيحٍ ومحمود

غلاه يسمح له ولو ما تفوه

ازعل ولي قالوا لجل عينه السود

اسمح ولجله خاطري زان جوه

واهمّل العالم يلي صار موجود

وكن الضلوع تقول منزلك جوه

فالصدر له دوله وله شعب وجنود

وقبايله فالصدر فيها حموه

تقبل مخاييله لها برق ورعود

ويحيي عروق القلب همال نوه

قلبي لغيره قد هو اليوم مسدود

ماله خشيرٍ فيه ماحْدن بتوه