كل من عنده ملايين لو قمت امدحه

قالوا الناس اهتمامي من أجل ارزاقها

لكن امدح راعي الطيب والله يربحه

الكريم اللي لما جات عنده ساقها

في طلبها و إن بدا شان ربعه ينطحه

لابته يفرض على نفسه استحاقها

من تحمل يزهم الله ضيمه ينزحه

والدراهم للجمائل يسن انفاقها

والقبائل خطها يعجب اللي سرحه

مايخيب هقوة امزرفين أوراقها

يستشير ومن تقصى معه يستسمحه

يحترم وجهة نظر ربعه وفراقها

والرفيق المعسر المنحرج ما يجرحه

بالكلام وشغلة المقتدر ما طاقها

ويسمح المخطي وينسى خطاه ويدمحه

واختراقات المشورة يحق احذاقها

والكلام اللي قليل دليل يشرحه

والهروج يصمت جلالها ودقاقها

وإن هدت لريا تركد ورايه يقدحه

وراية العليا على بابها واغلاقها

ما يصير الشاعر اللي بيده المسبحه

والقلوب الصادقه ما يثير أشواقها

من تقبل زين والثاني الله يصلحه

يحتمي سخصيته فوزها واخفاقها

ومن يطيع ابليس يغويه حتى يصفحه

من مواجيبه وميعادها واسواقها

اللعين ابليس ف النار وده يطرحه

والبشر يحرص على شتها واحراقها

والبشر فيهم مقصر عمار وقبحه

لا تحرا الخير من صوبها وارفاقها

والفطن معناي من منطقي متصفحه

يشتري بعد الوجيه الغبر وافراقها

والبعيد الى عثر صد منه واكسحه

وعز نفسك من مجيه وعز ارواقها

شد من دار المهانه وشف لك لبرحه

اغد فيها حر واطراف بيتك لاقها

والسعة براقها دام عينه تلمحه

سجها من حيث ما خيلت براقها

جنب المثبور واترك صديق المصلحه

والجهاف اللي بزادك تبل ارياقها

ما يسرك كل رأس من الشح انقحه

خزنة الضيعه يبيعك على سراقها

والجمل لي طاح جا كل كلب ينبحه

ويتسمم شامخ الناب من دفاقها

كم شموخ مات خلف قموح يفضحه

فاشل ف الدورة السابقة واللحاقه

ا الله يرحم ذائع الصيت والله يفسحه

بصمته شمس يعم المحيط اشراقها

القبائل وثق اقبالها لا تمسحه

وانتبه تحكم على القوم من طوراقها

ماعليك من السوالف وكثر القنزحه

الخلاصة في تدلاقها وادلاقها

المراجل قندله والمواجيب ارزحه

تنتعش وتعيش من دردشة عشاقها

الزمان يعلم المنعوج ويسمحه

الثجج رشانها والجثث رشاقها

يمنح المحلب ومن وضعه ما يمنحه

مرة اخرى ومن مد عشره عاقها

الزمان يقول فال الشبب من يكفحه

يكتم أنفاسه ويرقب شعار اطلاقها

وضع الطاسه كذا واللبن ما قرطحه

والله إن يبطي عظم من يده ماذاقها

يشغله في هجن سيدة سباق ترمحه

والمحالب لا يفكر بها دهاقها

اسمع اللي يختبره الزمن وينجحه

ويتفوق في رتقها وفي ترياقها

الزمان الصيهدي شرب من جال اقدحه

والحلاوة والمرارة يعرف أطباقها

والزمان يبيته والزمان يصبحه

رغم ذلك سمعته ما نزل معلاقها

من سمو النفس يكشخ ويلبس مشلحه

هامته من شافها يحترم عملاقها

يوم بعض السادة العسر صوته يذبح

ويقتل أطراف المساكين خشي املاقها

للمزيد اليوم كلا جهازه يفتحه

كل شي موجود والناس حسب اذواقها

أنت يلي تعرض البيض عند مفوحه

تجمع البيضات وتبيعها سلاقها

راس مالك راح والربح كيف توضحه

زلقوك اللي تربعت في زلاقها

روحك اولى يوم غيرك تقوم تسنحه

باللحاف وروحك البرد هد أعماقها

يا خبير الناس مسترزقه ومشلحه

والشيم معاد تطري على من راقها

اليتاما الحز في روسها ومسجحه

ومن نظر فيها تحسب على حلاقها

لين جا ليث من انكر مسيره يبنحه

بعد ما قدخذت الروس من دناقها

تفرض أخلاقك مكانك ونوطك تمنحه

والأمم ما تنهض إلا بحسن أخلاقها