ياالله يااللي علينا باسط ٍ ظلّه

يااللي علينا لما ضاقت يفرّجها

قال ابن ناجي بدع قاف ٍ لمن شلّه

أبيات منّه تسلي اللي يهرّجها

يا قلب كبّ الخطأ وابعد عن الزلّه

ابليس يركض على خيله ويسرِجها

يغريك ثم عقبها ياتي لك بفلّه

والنفس لي هتربت من عاد يخرجها

لا تشتغل بالخلايق كلا ً ودلّه

واللي على كورته خلّه يدحرجها

يا قلب ودّي بعصرية ٍ مع دلّه

شوف الخلا من حرور الكبد يثلجها

والشور يا قلب يطربني على حِلّه

والفال في دَر ّ عِرْب ٍ يوم يلهجها

احوارها لا يطوّل يا الشلي تِلّه

لي طوّل احوارها خطر انه يمرجها

يا زياد قلب العنى كنّه على ملّة

كنّه يصالى بنار ن زاد واهجها

من سيف هاجوسه اللي دايم يسلّه

حرّم على العين بااسبابه وشايجها

يا زياد يا عزوتي حبل الرجا من له

اسبر مداخيلها وافطن مخارجها

يا زياد خاو الشلي وامّا الردي خلّه

اللي لما قنبعت عينه يدارجها

والصمت يا زياد للرجّال فيد ن له

لين المخاليق تبدي له مناهجها

وترى لسان الفتى يا زياد قيد ن له

وحذراك من كلمة تغتال هارجها