يالله بعلمٍ يسر ويبهج الخاطر

ويالله برزقٍ حلال ويقضي الحاجه

ربي كريمٍ ماينسى عبده الذاكر

وبابه وسيعٍ وغيره صك مزلاجه

يزيد خير الكريم الحامد الشاكر

ويحرم بخيلٍ مايوسع حقه ادراجه

مابغى غناة الكبر والتاجر الفاجر

ابغى غناتٍ من الديان واحراجه

لاجا يذكرني بدينه وانا خابر

قمت اتجنب دروبه خوف نتواجه

ودي اسدده دينه حاضر بحاضر

ويروح من عندي وهو يضحك حجاجه

بس المصيبه رصيدي ماهو بقادر

وماعندي اللي بيسلمني من ازعاجه

بصبر وبصبر مادام الله مع الصابر

والله كريمٍ بيده الضيق وافراجه