يالله ياللي تعلم السر والخفا

سبحان من ينشئ علينا مخايله

لك الحمد يا رحمن والشكر والثناء

جزيل العطاماحن بنحصي فضائله

انا لي بغيت أجامل الوقت ما قدره

حبلنا ولا نقدر نخلص حبايله

واناأسباب ماهيض غرامي وهاضني

علوم على بعض الرجاجيل مايله

تقدم يدين ما عرفنا لها مدى

وتؤخر يدين مقدم الوقت طائله

وتسموى رجالٍ بالخلف بعد منسلف

كما العد دفن ولا بقى الا نثايله

وبعض الرجال يقول انا من حموله

وجدي فلان وعادني من سلايله

تسموى بفعل مجرب راح وانتهى

زبن فعل جده يوم عابت فعايله

هو ما درى ان الضو ترث رماده

ولا يسقي الضامي سراب يخايله

من اول لي غرّب الرجل ثم حضر

تعم شيبان القبيله جمايله

واليوم كثرتهم مكاسيبه الردى

وهدايا بني عمه ترقع خمايله

ان صاد خير ما دروا به جماعته

وان صاد شر جاك يسحب فشايله

ومن اول لي جاء صبي تباشروا

ولا يرشد الا وافيات خصايله

واليوم من جاله صبي تجور

ويقول يالله بالستر من فعايله

ارى المال يلعب دور والبشت والقلم

وتغانى بها بعض العرب من قبائله

فلوكل من هو يشغل النفس بالعناء

يفكر ويدري ويش صافي حصايله

مشارير وأعمال على خيبة الشقاء

وكسبه قليل ما تعدى حلايله

ارى في الرجال مجرب شاجع وفي

صدوق وصدقه بينات دلائله

وفي مع الوافي غيور من الخطاء

ولا كل محتال لزوم يحايله

حريصا على دينه وعرضه وسمعته

وصبورا على لدنين والحمل شايله

مع رجال الجود تلقاه مهتوي

وعلى رجال الشر تقدح فتايله

ماهو بخاطي واحد يزرع النشب

بين القرايب مولعات شعايله

يعقب على الأجواد يسقط فعولهم

من شان يصغر قدرهم عند قائله

والى رجاجيل النواميس ينتمي

كنه مثيل لهم وكنهم مثايله

ما دامها بالحكي فهو أطيب العرب

ولما بدا اللازم تردت وسائله

ويشوف له حق على الناس كلهم

وهو لاعطى حق ولآهو بنايله

وجري على ربعه الى قام واعتدى

وهو من العائل هزال رحايله

وان شاف خملات ابن عمه يذيعها

وان شاف جوداته يبين هزايله

جريا على الهزله اذا جاء يقولها

وهيوبا الى جاءالطيب ماهو بقايله

يباهي بنفس ماعرف كيف قدرها

تبعها وهي تمشي وتكتب رذائله

تبعها وهو من قرد حضه يطيعها

وعلى الجد والعاني كثير زلايله

ان وافقته المقديه ما يسدها

وان سدها غيره كثير عذايله

والقاف شاب وكل ما قلته انتهى

والقول مقيوساً على عرف قائله

بديت باسم اللي فطر الارض والسماء

سبحان معبود كثير فضائله