الرفيق إلي لماحزت ولزت كبك.

لا تعده لك رفيق بعد ذيك الساعة.

دام هو خلاك وانت بحاجته مانبك.

والله ان فرقاه عند العارفين اطماعة .

ومن يمثل في الفهاني والعوافي حبك.

فترة وتكشف تصاريف السنين قناعة.

المواقف والهيازع نعمة من ربك.

تثبت إلي للرفق شاريه وإلي باعه.

الرفيق الصادق يبين لونه يسبك.

يرتكي لما زما العايل وهز ذراعه.

لو يهبك من عواصيف الدهر ماهبك.

شامخ صلف الهبايب ماتشق شراعه.

يحتمي الماقف لما شافك ثنيت ركبّك.

والزعل مايجعله وقت اللزز شماعة.

ماعليك من الشلي تحنبه ويحنبك.

إن عطى ما منّ وان اكتال يوفي صاعه.

جعل يفداه الردي اللي بالردا يقربّك.

الردي إلي في السعة بابه على مصراعه.

وان بدالك واجب واحتجت له مالبك.

مادرى الايام تبدي للرجال اطباعه.

وان بغيته للطريق الواضحة يجنبك.

للدروب العوج مايبغى النقى واسناعه.

ينشب الحجة ويصبح للرجال مشبّك.

ماحسب في حجته مدخاله ومطلاعه.

دام هو ماطب عمره مستحيل يطبك.

يدعي انه سبع مايدري وراه اسباعه.

في غيابك مع قصيرين الحبال يجبك.

السنتهم في القفاء مفتوقة قطابعه.

في الرخا فصيح قول وفي القسا متلبك.

من علوم اهل النقا والطيب يقصر باعه.

في النهاية كل من هو يكرهك ويحبك.

والله ان تكشف لك ايام السنين قناعه.