الهاتف اللي لفاني في مسى الجمعه

كدر علي ليلتي والناس ممسيني

قالو رفيقك رحل ثم خرت الدمعه

وانا قبل ذالخبر همي يباريني

جيته وهو منسدح وحييته بكمعه

ثم قلت ياهادي المنعور توحيني

من حر مونس احسبه مرخيٍ سمعه

واثري اخمن لعل انه يحاكيني

من بعد ماييست منه راحت الطمعه

طامع لحل يحيا يطلع يماشيني

جريت زفرات باقصى الجاش مجتمعه

واقفيت من جثته ولده يساديني

ياولله اللي رحل من بيننا شمعه

ويمين اضرب بها خصمٍ يعادييني

ياحي زولك ياهادي ماهي برمعه

قولٍ حقيقي ماهو قول المصافيني

بابطي وانا انعيك يانجمٍ خفى لمعه

كني بن هدلان يافديع القحاطيني

يالصامل اللي لربعك لاحصل جَمعه

انت اول الناس في شتى المياديني

ماقد ذكر في القرابه منكم خمعه

تشوم نفسك من اعلوم السفاهيني

ويالله عسى كل نفعٍ ماهو سِمعه

وفرج على اللي قريب والبعيديني

ينجيه من هول يومٍ فيه مجتمعه

كل الخلايق بيوم الحشر والديني