الحب حوض(ن) وارده ستين صنف من العباد

احد(ن) غرف بالملعقه واحد(ن) بسطل الماء غرف

واحد(ن) دخل في معمعه واحد(ن) شرب كاس البعاد

واحد(ن) من اخلاصه على خده من ادموعه ذرف

اقولها وانا كلامي…… لا نطقته ما يعاد

جربت… انا والتجربه برهان…. للي ما عرف

واثق بنفس الوقت عارف ماخذ(ن) درس(ن) وكاد

علمني اشلون الغلا … كالسيل لا منه انجرف

ماكل من شفته يثير.. ولو…كسى عينه سواد

وما كل من شفته .. يدش القلب لو بالرمش رف

وانا عيوني ما يكحلها سوى .. اللي في المراد

فيها ترف لا… والذي نعبده هي (ام الترف)

يا لايمي في حبها ..خلك بعيد وفي حياد

شرف الى جتني وقالت وش علومك لي شرف

هذيك لا مرت على بعض البشر صارو جماد

والبعض انا باستغفرك يارب خطر(ن) ينحرف

العين فيها الرمش طاغي.. والحلا غطى وزاد

وعقل.. وثقل .. منه كفو يقدر يدوس الها طرف

لله حكمه ..حط للوجه الحسن.. حب ..ووداد

ولله حكمه.. في وجيه(ن)….. كلها هم.. وقرف