ياشين وجه الزمن لا طاحت الهيبـة

ينهال صف الخرز من عقدة الماسي

ماعاد يرجع جماله عقـب ترتيبـة

ما مثل الاول والاول طاح متواسـي

واللي انكسر خاطره ياريح هبي بـه

باعف نفسي عن امثاله ومجلاسـي

ماعندنا لـه مكـان مـن عذاريبـه

ان كان حده على البهتان الافلاسـي

يجحد وينكر هل الطولات والطيبـة

لا حول ياللي تعد اوهامك انفاسـي

لو بحت للناس بعلومه ظهر عيبـه

لكن تمسك بحفظ السـر هوجاسـي

وان كان في خاطره شـي يهذريبـه

لاعاد يرسـل علينـا كـل بلاسـي

مادام كلـن مـن العربـان داريبـه

يظهر ولايختبي مابيـن الاقواسـي

الصبح يجلى ضياه الشـك والريبـة

والليل يستر دجاه الغافـل الناسـي

وان قام وادي الذيابة من عوى ذيبة

اللي عوى فوق مرقاب النقا الراسي

تقـوم لعيونهـم بقعـا وتسريبـه

ويصبح براسه مثل قرعات الاجراسي

وان شان وقته بعد ماطاحت الهيبـة

يقطف ثمر ماغرس في وقته القاسي