يقول ابن ظافـر تكـدر منامـه

وملوعه غربـال الايـام تلويـع

القـل والحاجـه تهيـن الكرامـه

والعز ضاع وعزة النفس بتضييع

ابا اغترب غربة ذياب وسلامـه

شدوا الرحال وودعوا نجد توديـع

شدوا الرحـال متيهيـن الجهامـه

يتلون ابن سرحان عجل المفازيـع

والبعد مـن دار المذلـه شهامـه

وبدل المرابيـع القديمـه مرابيـع

بابعد ولا يلحـق بعيـدن ملامـه

والله لخلقه وسـع الفـج توسيـع

وآهج ليـن امـا تقـوم القيامـه

والا يغيبني الثرى واسلـم الريـع

غربة عزيز النفس الوقت ضامـه

ماهي لليالـي ولا هـي باسابيـع

على ثرى الغربـه يبنـي خيامـه

تايب من ارض القاطعين المقاطيع

ما ينحني راسي لخاطـي هلامـه

في حكم اخو نوره يصف القراديع

المال عز احمـاه وارفـع مقامـه

لا يلحقه بردن ولايرقـد اجويـع

يصلح مقهوي في مجالس عمامـه

يامر عليه اصغر هل البيت ويطيع

واللحيه العشمـا ونـا بالكرامـه

تصلح وقاه يلمـع البيـت تلميـع

تنومس الخـادم بلبـس العمامـه

والعبد يشري في هل الدار ويبيـع

قاموا يبون اخضاع راعي الزعامه

وهم بايجونه خاضعين مخاضيـع

لابد مـن يومـن يغـرد حمامـه

تطيب به روس الرجال المصاديع

الصقر ما يلفـت نظـر للقهامـه

والنذل ما بيني وبينـه مواضيـع