البل عطايا الله وماخاب قانيها

والخايب اللي يعذربها ويشناها

مايدري انا نقدرها ونغليها

واللي جهل قدرها ياجعله فداها

لا روح العصر ثم قمنا نباريها

انشهد انها طراة النفس ومناها

خص الذلول العجيبه في مواريها

اللي نهار التحدي ماذخرناها

لامن بدا شوطها تعلن تحديها

تضرس وهي مابعد بانت ثناياها

قطما سنادا دقاق الحقو زاويها

وكنها تبين لراعيها بممشاها

لا روحت والمنادي قام يدعيها

كنها هنوفٍ ماتسمع غير لباها

ولا كما عسكرٍ تخشى مجازيها

تسمع الاوامر وتضبط له سراياها

وان صاح فيها ماتلمس الارض بيديها

تحرك وكن حثيث الموت يحداها

كنها غريمٍ لقومٍ جاه نابيها

واقفى من الدار والديره وخلاها

وتفوز بالجايزه ماشغل اليها

جعل الولي من عيون الناس يحماها