الشاعر اللي جعلني راعي العنه

من وصلني ردلي منه تجاويبي

لا جاتني رمحة من رجل مستنه

ما كل شي على الغالين ياتي بي

وصل الحكي من رفيق كامل سنه

لا مروة تنصقه ولا تجاريبي

مقدره بدة الخلان واحنه

وابغيه ذخر إلا باروا الاصاحيبي

أبو حمد ما يناسب ذا الحكي منه

كثر المدايح ولحاق المشاهيبي

حط العذاري هواه ومنتهى فنه

ويقول أنا مكملين لي مطاليبي

كم من هنوف علي تجر بالونه

كل الصبايا على زولي شراهيبي

يابو حمد لا تحط بنفسك اشخنه

بالطيب ما يلحقك شك ولا ريبي

عدو عينك يحط البيض له منه

جحادة الطيب مظهرة العذاريبي

لا هم يخافون من نار ولا جنه

ولا يذلون من ضرب المشاعيبي

إن اقبلوا فانت رب الفرض والسنه

وان دبروا ما تفيد بهم الاطابيبي

يا بوحمد كيف منك يختلف ظنه

نسيت يوم ابعدت بك شمخ النيبي

ما هوب لك ذا الحكي غير ابتعد عنه

واظهر فعولك مع ربع معاطيبي

وإن ابعد العدو هجنك زيد زارنه

تنوش داره على عوج المصاليبي

يابو حمد لا تجي في راسي الصنه

ابعد عن الناس عطبين المضاريبي

لا تمتدح بالعذاري جعلها الكنه

غير امتدح بالشجاعة والمواجيبي

خل المدايح لخبل مقرع شنه

ومن الحسايف طلع في راسه الشيبي

اللي يحبه تهيد والغلا شنه

لا شاف وجهه فكنه شايف ذيبي

يركض وراهن ولو هن ما يريدنه

ومن بغضهن له يكوون العراقيبي