جيت ألبي دعوة اصحاب السعاده والفضيله

شاعر أسّخر المعنى على درب الفلاح

هاجسي مقنده و موازن بنه وهيله

ماهي بطبخة غشيم ماعرف سر النجاح

ماخذيت إلا سمان الهرج واخلي الهزيله

دام موضوع الشعر ذا الليل بعلوم الصلاح

في حديث وفي نصايح كلها اعمال جليله

ماخذه شكل التواضع والمحبه والسماح

اصبحت طب يداوي للجروح المستحيله

واصبحت نور كشف وجه الظلام الين زاح

يانهر جاري بعلم الدين عذب سلسبيله

الجهود مقدره والصدر ياتيه إنشراح

من دعاة علمهم من غير شك وغير ميله

مادعوا للتفرقه والشتم في ليل وصباح

يدركون ان دعوة الله باليسر افضل وسيله..

قاله الله بالقران وبالأحاديث الصحاح

ديننا ماهو يفرقنا على لون وقبيله ..

دينا وحده وقوه ماينافسها سلاح

كالجسد لو يشتكي عضو تزيد به المليله

اخوة وقت الرخاء وان جات ليام الشحاح

امة الشجعان والفرسان ماعاشت ذليله

أسالوا اليرموك ثم حطين عن وقع الرماح

بين فتح وبين مجد وبين علم نرتقي له

يكتب التاريخ سيرتنا على عزم وكفاح

والختم صلوا عدد براق ليلٍ نستخيله

للرسول محمد( ن )عد مارف الجناح